Հարձակում Թբիլիսիի հայկական եկեղեցու վրա. Վիրահայոց թեմի հայտարարությունը. news.am

news.am-ը գրում է.

Երեկ` հուլիսի 19-ի երեկոյան հարձակում է տեղի ունեցել Վրաստանի մայրաքաղաք Թբիլիսիի հայկական Սուրբ Էջմիածին եկեղեցու վրա: «Վրաստանի Հայ համայնք» ՀԿ լրատվական բաժնի ղեկավար Ալեքսանդր Օհանյանը NEWS.am-ին փոխանցեց, որ Սուրբ Էջմիածնի վրա հարձակվել են հայկական եկեղեցու հարեւանությամբ բնակվող մի քանի վրացիներ:

Վեճը սկսվել է կենցաղային հողի վրա: Նրանք նախ եկեղեցու տարածքից դուրս վեճի են բռնվել հավաքված հայ համայնքի ներկայացուցիչների հետ, որն ուղեկցվել է հայհոյախառն արտահայտություններով, հիմնական՝ ազգային պատկանելությանը վերաբերող: Կարճ ժամանակ անց նրանք հեռացել են, այնուհետեւ վերադարձել ավելի մեծ խմբով, ականատեսների փոխանցմամբ՝ 35-40 հոգով, դանակներով եւ մահակներով զինված:

Կատարվածի առնչությամբ հայտարարություն է տարածել Հայ Առաքելական Եկեղեցու Վիրահայոց թեմը: Այն ներկայացնում ենք ստորեւ.

«2014 թվականի հուլիսի 19-ին, երեկոյան ժամը 17:00-ի սահմաններում, Թբիլիսիի Սուրբ Էջմիածին եկեղեցու բակում, ազգային եւ կրոնական ատելությամբ դրդված, իրականացվել է ծրագրված հարձակում Թբիլիսիի Սուրբ Էջմիածին եկեղեցու հոգեւոր դասի, թեմի պաշտոնեության եւ հավատացյալների վրա:

Նույն օրը, կեսօրին ոմն վրացուհի եկեղեցու պարսպի մոտ կայանել է իր մեքենան եւ չի կարողացել այն դուրս բերել՝ խոչընդոտող այլ մեքենաների  պատճառով: Նրան օգնություն են առաջարկել Հայ Եկեղեցու հոգեւորականը եւ թեմի պաշտոնյաները: Սակայն կինը մերժել եւ զանգահարել է իր մտերիմներին, ովքեր գալով՝ եկեղեցու բակի մոտ օգնել են դուրս բերել մեքենան՝ միաժամանակ ազգային բնույթի հայհոյանքներ տալով հայ հոգեւորականի եւ Առաջնորդարանի պաշտոնեության հասցեին: Եկեղեցու աշխատակիցներից մի քանիսը մոտեցել են, որ կարգի հրավիրեն նրանց, սակայն վերոնշյալները շարունակել են իրենց խուլիգանական պահվածքը եւ նույնիսկ հարվածել եկեղեցու պաշտոնյային, ինչն էլ պատճառ է դարձել ծեծկռտուքի: Կարճ ժամանակ անց երկու կողմերն էլ հեռացել են:

Երեկոյան կողմ նույն խումբը, հավաքագրելով մոտ 50 հոգի, հարձակվել են եկեղեցու առջեւ կանգնած Տեր Մանուկ քահանա Զեյնալյանի, թեմի Իրավական հարցերով եւ համագործակցության բաժնի տնօրեն Լեւոն Իսախանյանի եւ տնտեսվար Ռոբերտ Իսախանյանի վրա եւ դաժանորեն ծեծել նրանց՝ մարմնական վնասվածքներ հասցնելով հոգեւորականներին եւ Առաջնորդարանի աշխատակիցներին: Հարձակվողները պոկել են հոգեւորականներից մեկի լանջախաչը եւ վերցրել են իրենց հետ:

Այդ պահին եկեղեցուց դուրս են եկել մկրտության արարողության մասնակիցներ, ովքեր փորձել են կարգի հրավիրել հարձակվող ամբոխին, սակայն եկեղեցու դեմ հարձակվողներն այս անգամ ուժ են կիրառել նաեւ մկրտության եկած ժողովրդի վրա, որոնց մեջ եղել են կանայք եւ երեխաներ, ովքեր այդ տեսարանից երկյուղած, նորից ետ՝ եկեղեցի են մտել: Այդ դաժան տեսարանները նկարահանվել են «Հայարտան» դիտարկող տեսախցիկներով: Մինչեւ ոստիկանների մոտենալը, Առաջնորդարանի վարչատնտեսական բաժնի տնօրեն Կարեն Երիցյանը իրեն ամրակցված օրինական զենքից մի քանի անգամ կրակել է օդ եւ հանդարտեցրել կռվողներին:

Այս պահի դրությամբ քրեական գործ է հարուցվել եւ ընթանում է քննություն: Բավական լուրջ վնասվածքներ է ստացել Լեւոն Իսախանյանը, ում տրվել է դատաբժշկական ուղեգիր:

Ականատեսները պատմում են, թե հարձակվող ամբոխը ինչպիսի ազգային ատելությամբ է լցված եղել հայության հանդեպ: Նրանցից ոմանք եղել են ալկոհոլի եւ  թմրադեղերի ազդեցության տակ: Ականատեսները վկայում են, որ եկեղեցու վրա հարձակված 50-հոգանոց ամբոխին ղեկավարում էին թանկարժեք մեքենաներով եւ վայելուչ հագուկապով այրեր: Այս ամենը Վրաստանի շատ եկեղեցիներում, երբեմն նաեւ լրատվությամբ, կենցաղային մակարդակով Հայ Եկեղեցու եւ ընդհանրապես հայութան հանդեպ սերմանվող ատելության արդյունք է:

Մենք բարձր ենք գնահատում Վրաստանի ներքին կայունությունը, այս երկրում բազմադարյա միջազգային եւ միջկրոնական հարաբերությունները եւ կոչ ենք անում Վրաստանի իրավապահ մարմիններին համապատասխանաբար գնահատել տվյալ գործողությունները եւ հետաքննել դրանք՝ որպես կրոնական եւ ազգային հողի վրա իրականացված հանցագործություն,  ձեռնարկել անհրաժեշտ միջոցներ՝ Վրաստանում ազգային եւ կրոնական նշաններով ցանկացած պառակտում կանխելու նպատակով»:

0

0