Previous Story
Մշակույթի նախարարությունը կաջակցի կամ ոչ՝ ներկայացում-քննարկումներից հետո
Posted On 22 Apr 2017
Comment: 0
ՀՀ մշակույթի նախարար Արմեն Ամիրյանն այսուհետ բաց ներկայացում-քննարկմամբ է որոշման դնելու, թե արդյոք նախարարությունը պետք է աջակցի, իսկ դրական որոշման դեպքում՝ որքանով պետք է աջակցի այս կամ այն ծրագրին։
Ապրիլի 21-ին տեղի ունեցավ 3 ծրագրերի նման առաջին ներկայացում-քննարկումը ( պրեզենտացիան), և ոչ նյութական մշակութային ժառանգության ոլորտի այդ ծրագրերը կշարունակեն ստանալ մշակույթի նախարարության ֆինանսական աջակցությունը՝ լրացումների և շտկումների նախապայմանով:
Նախարարին ներկայացված այդ ծրագրերն են ՝«Սասնա ծռեր» կամ «Սասունցի Դավիթ» էպոսին նվիրված ավանդական հանրապետական փատատոնը, «Հայաստանը խաղաղության խաչմերուկում» միջազգային ֆոլկ փառատոնը և «Երկնքից երեք խնձոր ընկավ…» հեքիաթասացության և բարբառի մրցույթ-փառատոնը:
Առաջիններին՝ 5-ական միլիոն, վերջինին՝ 3 միլիոն դրամով պետությունը կաջակցի, բայց….
«Իհարկե պետությունը պե՛տք է աջակցի նման փառատոններին, բայց նրանք չեն կարող անընդհատ գոյատևել միայն պետության միջոցներով: Ինչ-որ մի պահից փառատոնը պետք է ինքնուրույն ապրի, որպեսզի նախարարությունը հնարավորություն ունենա օժանդակելու նոր փառատոնների»,-ասաց Արմեն Ամիրյանը՝ հորդորելով առաջնորդվել նաև գործարար մտածողությամբ:
Մասնավորապես, «Հայաստանը խաղաղության խաչմերուկում» միջազգային ֆոլկ փառատոնի ծրագիրը ներկայացնող «Ավանդական տոների վերածնունդ» կրթա-մշակութային ՀԿ նախագահ Հասմիկ Բաղրամյանին ասաց.
«Մեզ պե՛տք է այս փառատոնը, որը Հանրապետության միակ ֆոլկ փառատոնն է, բայց պետք է տեսնենք նրա՝ բազմապատկվող տնտեսական էֆեկտը: Դրա համար պետք է համագործակցեք տարբեր կազմակերպություների հետ: Լուրջ ուշադրություն դարձրեք ծրագիրը հանրությանը լավագույնս ներկայացնելուն»,-ասաց նախարարը:
Հովհաննես Թումանյանի թանգարանի տնօրեն Նարինե Թուխիկյանի հետ, որը ներկայացրեց «Երկնքից երեք խնձոր ընկավ…» հեքիաթասացության և բարբառի մրցույթ-փառատոնի ծրագիրը, պայմանավորվեցին՝ Թումանյանի 150-ամյակին ընդառաջ փորձել փառատոնը դարձնել տարածաշրջանային:
Ալիսա Գևորգյան
