Կբացվի Միրյանա Տոմաշևիչի գրաֆիկական աշխատանքների ցուցահանդեսը

Հովհաննես Շարամբեյանի անվան ժողովրդական ստեղծագործության կենտրոնի և Հայաստանի Հանրապետությունում Սերբիայի Հանրապետության հյուպատոսության նախաձեռնությամբ` ս. թ. ապրիլի 6-ին, ժամը 13:00-ին, կենտրոնում կբացվի սերբ գեղանկարիչ Միրյանա Տոմաշևիչի գրաֆիկական աշխատանքների անհատական ցուցահանդեսը: Այն կգործի մինչև ապրիլի 12-ը:
Միրյանա Տոմաշևիչի ստեղծագործությունները հարում են «գրաֆիկայի բելգրադյան դպրոց» անվանվող ուղղությանը: Նա այդ դպրոցի հիմնասյուն, պրոֆեսոր Բոժիդար Ջմերկովիչի լավագույն սաներից է և նրա գործի շարունակողը: Հավատարիմ մնալով պրոֆեսորի գործին՝ նկարիչը ձևավորել է ստեղծագործական ուրույն ոճ, որում առկա անսահման տարածքն արվեստի գործերին հնչեղություն և ժամանակակից պոետիկա հաղորդելու տեխնոլոգիական նորարարություն է:
Միրյանա Տոմաշևիչը ծնվել է 1967 թվականին, Բելգրադում: 1991 թվականին ավարտել է Բելգրադի Արվեստների համալսարանի կիրառական արվեստի ֆակուլտետի գրաֆիկայի բաժինը, 1994 թվականին՝ նույն ֆակուլտետի մագիստրատուրան: Կիրառական արվեստի ֆակուլտետում աշխատում է որպես գրաֆիկայի դասախոս:

Մասնակցել է անհատական և խմբակային բազմաթիվ ցուցահանդեսների, բիենալեների և տրիենալեների: Արժանացել է բազմաթիվ մրցանակների և պարգևների: Նրա աշխատանքները գտնվում են աշխարհի տարբեր թանգարաններում և մասնավոր հավաքածուներում:

0

0