Երևանում անցկացվում է Վլադիմիր Կրայնևի անվան դաշնակահարների միջազգային 2-րդ մրցույթի ընտրական, տարածաշրջանային փուլը

Ս. թ.  փետրվարի 26-ին, ժամը 14:00-ին /ԶԼՄ-ների համար ճեպազրույցները` 13:30-ից/, Երևանի Կոմիտասի անվան պետական կոնսերվա­տորիայի մեծ դահլիճում կկայանա Վլադիմիր Կրայնևի անվան դաշնակահարների միջազգային 2-րդ մր­ցույ­թի ընտրական, տարածաշրջանային 2-րդ փուլը: 
Մրցույթը նախատեսված է երկու տարիքային խմբի` մինչև 13 և 13-18 տարեկանների համար և անցկացվում է 4 փուլով: Մրցանակային ֆոնդը կազմում է 50.000 (հիսուն հազար) ԱՄՆ դոլար, նախատեսվում են բազմաթիվ համերգներ աշխարհահռչակ նվագա­խմբերի հետ և մենահամերգներ՝ աշխարհի լավագույն բեմերում: Եզրափակիչ փուլը կանցկացվի Վլադիմիր Սպիվակովի ղեկավարությամբ գործող Ռուսաստանի ազգային սիմ­ֆոնիկ նվագախմբի մասնակցությամբ: Մրցութային հանձնաժողովի կազմում են` Ալեքսանդր Ռոմանովսկին (Ուկրաինա-Իտալիա), Տոմաս Բեկդորֆը (Չիլի), Ջուզեպե Անդոլորոն (Իտալիա), Ալեքսանդր Մուտուզկինը (ԱՄՆ), Կատյա Սկանավին (Ռու­սաստան), Միխայիլ Շալամովը (Գերմանիա):
Տեղեկացնենք, որ Վլադիմիր Կրայնևի անվան դաշնակահարների միջազգային 2-րդ մր­ցույ­թի 1–ին փուլը կայացել է 2016 թվականի նո­յեմբերի 1-15-ը. այս փուլում մասնակիցները ընտրվել են ձայնա­գրու­թյունների միջոցով: Մրցույթի 2-րդ ընտրական փուլը, որը կենդանի լսումների ձևաչափով է, անցկացվում է 2017 թվականի հունվարի 1-ից փետրվարի 28-ը, 7 քաղաք­ներում` Մոսկվա, Սանկտ–Պետերբուրգ, Տոկիո, Միլան, Պեկին, Նյու–Յորք, Երևան: Մրցույթի 3-րդ և 4–րդ փուլերը կանցկացվեն 2017 թվականի մարտի 27-31-ը, Մոսկվայում` Երաժշտության տան մեծ դահլիճում:
Երևանյան փուլի լսումներին կմասնակցեն 9-ը պատանի դաշնա­կահարներ. Հայաստանից` 6-ը, Ռուսաստանից` 2-ը, Վրաստանից` 1-ը:
Երևանյան փուլի հանձնաժողովի կազմում ընդգրկված են` մրցույթի գեղարվեստական ղեկավար Ալեքսանդր Ռոմանովսկին /Ուկրաինա-Իտալիա/, անվանի դաշնակահար, ՌԴ Ժողովրդական արտիստ, Չայկովսկու անվան միջազգային մրցույթի աստղերի ասոցիացիայի նախագահ Վլադիմիր Օվչիննիկովը /Ռուսաստան/ և ՀՀ վաստակավոր արտիստ, միջազգային մրցույթների դափնեկիր, ԵՊԿ-ի դաշնամուրային ֆակուլտետի դեկան Արմեն Բաբախանյան /Հայաստան/:

0

0