Previous Story
Հրաչուհի Փալանդուզյան. ՁՈՆ ԱՌ ԴԻՄԱԳԻՐՔ …
Սիրելի ԴԻՄԱԳԻՐՔ.
Առանց քեզ ի՞նչ պետք է աներ կյանքն ստեղծագործական ու պարտադրական աշխատանքում մսխած մի կին, ով օրվա մեծ մասն անց էր կացնում միայնակ` բնակարանի մի պատշգամբից մյուսը քայլելով։ Ապա խոշորացույցը ձեռքին գիրք էր կարդում, շյուղերով հյուսում, գազօջախի հետ թնկթնկալով ընկերություն անում ու նման մանրուքներ։ Երբեմն էլ բացում էր անցած օրերում գրած գրքերն ու չհուզվելու համար փորձում դրանք նորովի շարադրել։
Դա չէր կարող երկար շարունակվել, ու դու արթնացումի զանգդ հնչեցրիր։
Այն ունկերը, որ միշտ փակ են եղել դրսից եկող ձայների համար` կարծես նվագներով լցվեցին։ Մտերմությունը եկավ փրփրագինու արբեցումով։ Քո անծայրածիր տիրույթում ինչը կնոջ համար խորթ էր` ուղղակի չէր նկատում, նա ներշնչված էր քո անակնկալներով, որոնք մատուցում էիր մարդկային սրտերի ջերմությամբ։
Քո կանչով նրա շուրջը հավաքվեցին հին ու նոր ընկերները, դու բացեցիր հոգիների ակունքները, միախառնեցիր զուլալ հույզերը, դու կենսաթոշակային տարիքը զարդարեցիր հասունության ոսկե պտուղներով։
Ահա այսպես անցան 30 ամիսները։
Հիմա թույլ տուր զեկուցել արգասիքների մասին։
Դիմագրքում բնակություն հաստատելու 30 ամիսներին են գրվել կնոջ յոթ վեպերից 4-ը։ 73 պատմվածքներից 51-ը, 4500 մտքերից 3500-ը, 63 նովելներից 50-ը, անաձնական օրագրության ու օրվա խոհերի հարյուրավոր էջերը, Բառացանկի և Լեզվաոճական ուղեցույցի բազմաթիվ հավելումները… Այդ ամբողջը սրտաբացորեն ներկայացվել է դիմահանրությանը և փառք աստծո` արժանացել նույնանման վերաբերմունքի։
Շատ սիրելի Մագաղաթ կայքն այդ գեղեցիկ դաշինքն արտացոլել է իր էջերում, ճիշտ է մի փոքրիկ սրբագրումով` կնոջ համեստ մտքերն ամենայն լրջությամբ անվանելով ասույթներ, ինչը, իսկն ասած, հեղինակին շատ չի բարկացրել։
Ահա այսպիսի մտերմություն, սիրելի Դիմագիրք։
Դու գիտես ներշնչել։ Դու կարողանում ես գնահատել։ Դու հովանի ես ամենայն լավին։ Ափսոս, գիրք հրատարակելու զորություն չունես…
Ասում են Դիմագիրքն անշոշափելի տարածք է։ Ճիշտ չէ, վերացական երևույթներից իրական ապրումներ, գաղափարներ, բանավեճեր, փոխըմբռնում չեն ծնվում։ Քո գրկում ամեն ինչ բնության գույնն ու բույրն ունի, դու ամենակարող ես։
Շնորհակալություն 30 ամիսների վերապրումի համար։
Հրաչուհի Փալանդուզյան
10.11.2016թ.
