Լույս է տեսել ճարտարապետության և մշակույթի պատմաբան, արվեստաբան Արգամ Այվազյանի «Մեզ պետք են մտքի զորավարներ» հրապարակախոսական շարքի 2-րդ հատորը

Օրերս լույս է  տեսել ճարտարապետության և մշակույթի պատմաբան, արվեստաբան Արգամ Այվազյանի հեղինակած հերթական «Մեզ պետք են մտքի զորավարներ» հրապարակախոսական շարքի 2-րդ հատորը՝ 464 էջ ծավալով։ Գիրքը հրատարակվել է «Գասպրինտ» տպագրատանը` հեղինակի ու Օնիկ Հարությունյանի միջոցներով։ Գրքի շապիկներին տպագրված են հայ մտավորականների, հասարակական ու քաղաքական գործիչների կարծիքներն ու խոսքերն՝ ուղղված մեծանուն գիտնականին։ Այստեղ ընդգրկված են Հայաստանի (այդ թվում և Նախիջևանի) պատմության և մշակույթի, հասարակական-քաղաքական, հանրային և բազմաթիվ այլ խնդիրներ շոշափող  2012-2016 թթ. մամուլում հեղինակի հրապարակախոսական, մատենախոսական հոդվածներն ու հարցազրույցները, բնագրագիտական հրապարակումները: Գիրքն օգտակատար է հայ ժողովրդի պատմության ու մշակույթի հարցերով զբաղվող անձանց, ինչպես նաև հուշարձանապահպան կառույցների մասնագետների համար։ Գիրքը բաղկացած է հետևյալ բաժիններից՝ հրապարակախոսություն, հարցազրույցներ, մատենախոսություն, բնագրագիտական հրապարակումներ, համացանցի դիմատետրի ստատուսներ, մեկնաբանություններ։ Մեկ ընդհանուր վերնագրի տակ մեկտեղված ու հրատարակվող հատորի նյութերում՝ նախորդ հատորի սկզբունքների համաձայն, վերականգնվել է բնագրային բոլոր կրճատումները, որոնք մամուլի հրապարակներում  դուրս էին թողնվել նրանց ծավալների, խմբագրման և այլ պատճառներով։ Վերջիններիս վերաբերյալ՝ նյութերի վերջում, նրանց հրապարկման հղումներում, տրված են համապատասխան տեղեկություններ, որոնք կողմնորոշիչ կլինեն ընթերցողի համար։ Մի քանի՝ մասնավորապես մամլո ասուլիսների հարցազրույցներում, որոնք սովորաբար բանավոր լինելու հանգամանքով պայմանավորված, հնարավորություն չի եղել այդ նյութերում վերականգնել հարցերին ու հարցադրումներին տրված հեղինակի պատասխանների կրճատված հատվածները։ Այդ օրինակ նյութերում` հեղինակի խոսքերը շարվածքում տրված են թավ տառատեսակով։ Ավելացնենք նաև այն, որ հրատարակվող նյութերը սրբագրական ու լեզվաոճական շտկումներից, աննշան խմբագրումներից բացի հավելյալ վերախմբագրումների չեն ենթարկվել և նրանցում արծարծվող ու լուսաբանվող խնդիրներին ընթերցողը կարող է ժամանակագրական կարգով հետևել հրապարակավ արտահայտված հեղինակի մոտեցումներին ու դիրքորոշումներին։ Հատորում զետեղված բաժինների նյութերը, դասավորված են ըստ ժամանակագրության։ Այն պատկերազարդ է. առդիր հրապարակվել են տպագրվող նյութերին առընչվող, ինչպես Հայաստանի Հանրապետության հուշարձանապահպան կառույցներում հեղինակի աշխատած տարիների, գիտական գործունեության առընչվող  և այլ բնագավառներում նրա մասնակցած  շուրջ 250 գունավոր  և սև ու սպիտակ լուսանկարները։ Գրքում զետեղված են հեղինակի հարցազրույցներն ու հոդվածներն,որոնք տպագրվել ու տեղադրվել են «Առավոտ․am», «Հայոց Աշխարհ», «Ժողովուրդ», «Առավոտ», «Իրավունք», «Գոլոս Արմենիի», «Մեդիա․am», «168․am», «Հայացք», «168 ժամ» թերթերում, կայքերում և ռադիոյում /Հանրային/։

Գարիկ Ավետիսյան

0

0