ՄԵՂՎԻ ԹՈւՅՆԻ ՄԱՍԻՆ

Մոտ 60 տարի առաջ Սևանի ավազանի Մարտունու շրջանի Վարդենիկ գյուղում երիտասարդ կինը թոնրից եռացող ճաշով կաթսան հանելիս այրել է ձեռքերը։ Այրվածքի հետևանքով առաջացած վերքերը ամիսներ շարունակ չեն ապաքինվել, վերածվել են տրոֆիկ խոցերի։ Ամռանը կանայք երեխաների հետ միասին գնում են գետի մոտ, անսպասելիորեն հայտնվում են մեղուները։ Բոլորը փախչում են, բացի հիվանդ կնոջից. նա շրջապատված էր մեղվապարսով և վախենում էր շարժվել։ Մեղուները պտտվում էին նրա շուրջը, կարծես ինչ-որ խնդիր էին վճռում։ Նրանցից շատերն իջան և խայթեցին կնոջ հիվանդ ձեռքերը, մյուսները հեռացան։
Կնոջը տարան հիվանդանոց, բժիշկները դժվարությամբ փրկեցին նրա կյանքը։ Կարճ ժամանակ հետո բուժվեցին կնոջ ձեռքերի վերքերը, ընդ որում, մաշկը վերականգնվեց` առանց որևիցե նկատելի սպիների։
Ի՞նչ է սա` հրա՞շք, թե՞ Աստծո կողմից տրված ենթագիտակցական ծրագիր, որով առաջնորդվում է առանձին վերցված մեղուն և ողջ մեղվաընտանիքը։ Հրաշքներ չեն լինում, մենք ընդամենը կարող ենք ուսումնասիրել, հասկանալ կամ ոչ` այն, ինչ վաղուց ի վեր տրված է ի վերուստ։
Ցավոք, ոչ միշտ ենք արձագանքում բնության ձայներին։ 1988թ. մեղուները գրեթե ողջ ՀՀ հյուսիսում նախապես տագնապ էին բարձրացրել` «ահազանգ սպասվող երկրաշարժի մասին»։Սակայն մեղվի, կրետի, շմելի, մելիտոնի կամ բոռի խայթոցները կարող են մեծ անհարմարություններ պատճառել, նույնիսկ մահվան պատճառ դառնալ։
Մեղուն խայթում է, երբ վտանգ է զգում, և դա ի սկզբանե ծրագրված ինքնասպանություն է։ Ապա ինչո՞ւ մեղուները խայթեցին հիվանդ կնոջը։
Կրետը կարող է խայթել մի քանի անգամ։
Եթե մարդը սատկացնում է մելիտոնին կամ ձիաբոռին, ապա պետք է արագ հեռանա, քանի որ թույնի հոտն ազդանշան է ողջ պարսի համար։
Ըստ վիճակագրական տվյալների` մեղուն և կրետն ավելի հաճախ են մարդկանց մահվան պատճառ դառնում, քան օձերը։

ԽՈՐՀՈւՐԴՆԵՐ ԽԱՅԹՈՑԻ ԴԵՄ

Պետք է հնարավորինս արագ հեռացնեք խայթը. եթե պայթի թույնով լի պարկը, ապա այն արագորեն կտարածվի օրգանիզմում։ 
•Վերքն արագ լվացեք օճառով, վրան դրեք սառցե խորանարդիկ, փոշիացրեք ասպիրինի հաբը և ներմերսեք վերքի մեջ։
•Ցավերը նվազեցնում է անուշադրի սպիրտը։ Այտուցն իջեցնելու համար օգտագործեք թրջած կերակրի սոդան (1։1) կամ ակտիվացված ածուխի փոշին։ Ածուխը հարկավոր է պահել վերքի վրա 8-12 ժամ։ 
•Եթե դեպքը տեղի է ունեցել դաշտում կամ անտառում, ապա օգտագործեք խոնավ կավը` պահեք վիրակապը մինչև չորանալը։
•Ցավերը նվազեցնելու նպատակով խմեք հակաալերգիկ հաբեր (կլարիտին, տավեգիլ, սուպրաստին, դիմեդրոլ,այլ)։

Հ.Գ. Լույս են տեսել հեղինակի «Մոգական բուժարարներ» մատենաշարի թվով 4 գրքույկները: Հիշեցնենք, որ վաճառքում է նաև հեղինակի «Պահապան ծառերի բուժիչ զորությունը» գիրքը: Հեղինակի բոլոր գրքերը կարող եք ձեռք բերել «Նոյյան տապան», «Բուկինիստ», «Նոր գիրք» և «Արտ Բրիջ» (Աբովյան 20) գրախանութներից: 

ՀԵՂԻՆԱԿ. ՋՈւԼԻԵՏԱ ՍԱՀԱԿՅԱՆ

0

0