«Աջակցենք սահմանամերձ բնակավայրերին» նախաձեռնությունը` Խաչիկ գյուղում

Հարգելի´ հայրենակիցներ, ինչպես արդեն գիտեք, հունվարի 31-ին «Աջակցենք սահմանամերձ բնակավայրերին» նախաձեռնությունը իր հերթական այցելությունն իրականացրեց Վայոց ձորի մարզի սահմանամերձ Խաչիկ գյուղ: Այս անգամ նույնպես կազմակերպվել էր արդեն ավանդական դարձած մշակութային միջոցառում նախաձեռնության բարեկամ Երևանի պետական տիկնիկային թատրոնի և «Մասունք» ազգագրական երգի- պարի համույթի մասնակցությամբ: Միջոցառումը սկսվել է միշտ արդիական «Անխելք մարդը» ներկայացումով, այնուհետև ելույթ է ունեցել «Մասունք» երգի -պարի համույթը, որը երեխաներին սովորեցրել է մի քանի ազգային պար: Թվում էր, թե այսքանով պիտի ավարտվի միջոցառումը, սակայն դա դեռ սկիզբն էր, քանի որ բեմ են բարձրացել Խաչիկ գյուղի պարի համույթի լուսավոր երեխաները և անակնկալ մատուցել իրենց գեղեցիկ պարերով: Նախաձեռնության անդամների հիացմունքը կրկնապատկվել է, երբ երեխանեըը գյուղի Սբ. Աստվածածին եկեղեցու սպասավոր Արսեն սարկավագի (ի դեպ, նա կարող է օրինակ հանդիսանալ մյուս համայնքների համար) ղեկավարությամբ մի քանի գեղեցիկ երգ են նվիրել մասնակիցներին: Այս անգամ ևս նախաձեռնությունը դատարկաձեռն չէր գնացել: Նվերները երեխաների կրթությանն ու զարգացմանը ուղղված ուսուցողական խաղեր ու դիդակտիկ պարագաներ էին, որոնք նվիրել են գյուղի նախակրթարանին և դպրոցին: Դրական և ջերմ տպավորություններով դուրս գալով մշակույթի տնից` հանդիպեցել են մեկ այլ զարմանահրաշ իրականության. ողջ գյուղն ու զորամասը ունկնդիր էր եկեղեցու զանգերի` ժամերգության կանչող ղողանջին:

Նախաձեռնությունը շնորհակալություն է հայտնում բոլոր նրանց ,ովքեր աջակցել են սահմանին ապրող մեր հայրենակիցների համար ևս մեկ միջոցառում կազմակերպելու հարցում:


Չմոռանանք` ՄԵՆՔ ՈՒԺԵՂ ԵՆՔ ՄԻԱՍԻՆ:

0

0